قصه لي انا و نايف

صباح الخير أو مساء الخير للي توه قاعد ..

ها السالفه يالربع صارت لي انا قبل كم سنه , ولو انا به بهارات بس

البهارات ماتحرق الطبخه .

وان فكني الله من نايف هالسالفه بتمشي على خير ..

قبل كم سنه يالربع توضفت بالرياض وبما اني من سكان الرياض

حسيت بانه حلوه لي ولو راتبه ماش ,,

والسالفه هذي له يمكن ثلاث او اربع سنين ماهو توه تحسبوني اتمسكن يوم اقول

الراتب ماش .

المهم ...

توظفت بها الشركه ولا اعرف به احد , واي واحد مثلي يمر بهالمئزق , اول مايدور عيال عمه

طبعأ عيال قبيلته .

ودوامي من فجر الله
لساعه اربع العصر كل يوم ماعدا يوم الجمعه , ياملين النويفج

حتى يوم الخميس حارميناهٌ يبونا نداوم .

واصدرت الوالده امر :: بأنه سوف تتحول وجبة الغداء من بعد الظهر الى بعد العصر وهو وقت طلوعي

من الدوام ( أويتلي من الجوع ) .

داومت لي كم يوم وتقل وجه رغوث ماعرف احد بس اتلفت , واتضحك , ابي غدي احد يرحمن

ويسولف معي .

بس غثني يالربع لي مطوع ويكرمون اخوانا الملتزمين عنه ...

يالربع شكله تقل وحش .
رجال ٍ كله عضل ,
وجسمه منا حلووُه .

ابد عدك تراعي < لكين شومرك > ,, عاد وشو كين شومرك مادري طراء علي الاسم وقلته .

المهم ...

لامنه شافني طير عيونه علي تقل وده يقبرن وانا حي .

لدرجة اني وسوست بروحي اقول يمكني صادمه او مسويله بلا وانا مادري او يمكن ناسي .

واحيان ارجع الذاكره لطفولتي , وما القابه الا والله الكفوف الي تجيني ماعمري ضربت احد .

قلت يمكن متخانق انا وياه مبطي وانا ناسي .

الوكاد .....

فضخ قلبي هكا المطوع ولامنه حط عينه بعيني دنقت وقمت اسبحن ( سبحان الله ) .

والمشكله انه ناشب لي وين مااروح ان رحت لدور الثاني الا هو معي , وان نزلت تحت الا هو قدامي .

ومرات يراعيلي ويضحك ,, ويتبسم ,, ويسولف مع روحه ..

تقل جالس يفكر وشلون يبي يذبحن ..

أنا والله يوم جاء عقب بلعت العافيه ... الظاهر لو هو جاين وقته

تســان ..

انصفرت من الخرعه ..

المهم ....

سمعتهم يدورون واحد يقاله نايف ..

وسئلت لي واحد عندي عن نايف هذا منهو ؟

قال انه جديد توه موظف هنا .

والله وانا اقمز بروح ادور وين نايف هذا ..

يقوم لقيته الا والله تقل نازل علي من السماء ,,

وانا اقوم املهطه ,,

واخذ علومه وياخذ علومي

ونروح انا وياه نبي نجلس نسولف بعيد عن الناس (( بمكان لايذ عن الموضفين خاص للمدخنين ))

لا تحسبوني ادخن .

المهم ...

ونسولف لنا شوي الا يوم طلع علينا المطوع رفيتسي ..

يوم شفته بغيت ابتسي ,,

والله وانا اقوم ارتعد يوم شفته ,, قال نايف انت وش بلاك تقل تراعد .

قلت مادري مار الظاهر اني مصخن او داخلن برد ...

نايف قام يراعيلي متهول من حتسيي ,, داخلن برد بعز القيض .

المهم ...

اني كيفت اني لقيت لي واحد يموت معي .

المطوع يالربع والله مابيني وبينه يمكن اقل من مكان رجاليين .

يعني اكيد اي سالفه نقوله بيسمعه .

وهو يقوم ويجي قدامنا ويجلس .

ويسلم والله وحنا نرد عليه وعيونه بس بي انا تقل مامعي احد .

قال : انت ساكن بحي النهضه صح ؟؟

قلت : هاه انا ؟؟

قال : ايه انت بسرعه ؟؟

قلت : لا والله ماني بحي النهضه .

قال : الا وقدام بيتكم مدرسه ..

قلت : مالك معاذ قصدي مالك لواء .

ويلتفت لخويي نايف قال : هذا وين ساكن ؟؟

قال نايف : اسئله انا وش دراني عنه ..

يوم التفت لي قلت : والله يامسلم ماني بنهضه .

قال : لا تكذب ..

قلت : دامه هلون بكيفك النهضه .. النهضه وش ورانا ..

والله وهو يرتفع ضغطه قال : انا ماستهبل معك ..

قلت : انت وش تبي مني .. تبي تعرف وين ساكن

قال : ايه .

قلت : انا بحي .... شارع .....واسمي نسيب كاكا .

المهم ...

يوم عرف عنواني .

قال : اذا طلعنا اليوم ابيك ,, لا تروح لين تمرني .

قلت : ابشر ...... ابشر ........

يوم قام من عندنا قال نايف : انت تعرفه من اول .

قلت : وين اعرفه انا توي موظف ماصار لي ثلاث ايام وانت اول واحد اعرفه

وهذا والله مادري وش يبي ..

قال : يمكن هذا مباحث وانت مسوي بلا ..

قلت : هاه ..... بلا

ياخوي انا وين والبلاوي وين ..

انا مره قطعت اشاره

راحت لأقرب مركز شرطه سلمت روحي ..

لا والاشاره بعد توه ماصارت حمراء توه برتقاليه ..

المهم .....

وكل هكا اليوم شايل همه .

لما انتهى الدوام .

يوم طلعنا وحنا مقبلين على البوابه الخارجيه .

وانا اوقف قلت لنايف نسيت لي حاجه بروح اجيبه انت الله يستر عليك انا معي سياره رح ..

يوم اقفى رحت انا وتغيبت وراء لي جدار وقمت اويتزززز عليه من بعيد

مامداه يطلع مع البوابه الا المطوع يوم نصاه والله وهو تقل نشده وراح على طول .

بهذه الحظه حسيت اني اباكلها صدق ... الرجال يتناني .

وارجع داخل وجلس لي حول نص ساعه .. والمشكله ماعندي الا عمال النظافه

تسني مشرف عليهم .. ابيه غديه ينتظرني ... ويروح

يوم خذيت لي شوين وانا اجزم انه اكيد ذلف ..

وانا اجيك مدرعم لسياره ابزبن للبيت ..

يوم اقبلت على السياره الا هذا هو بجنب سيارتي يتناني ..

مقطوع البذر ... مدري وش عرفوه لسيارتي ؟

والله وانا ادنق تسني ماشفته .

واسمعه يصوت ياشيخ !! ياشيخ !!

وانا من الخرعه اغمض تسني ماشفته .

يوم ركبت السياره

الا هذا هو عند الباب قال : ماتسمع الله يجزاك خير ..

قلت : ماعليش مبتلش بدوام اليوم ماني يم احد .

قال : كم راتبك ؟

قلت : مايصل الثلاث الاف .

انا قلت يمكن اكسر خاطره .

قال : طيب ...

وش رايك بثمانين الف ريال ..

قالت : هاه ثمانين الف ريال .

من الي مايبيه .

قال : خلاص خلك بسارتك وراي ومايكون خاطرك الا طيب .

مالك الا واحد يحط بيدك ثمانين الف نقد ...

انا بها الحظه حسيت شمر راح يفتقدون فارس ٍ لم يعطيه الزمن فرصه .

قلت بقلبي : لايكون مرسله منصور البلوي يتعاقد معي بنادي الاتحاد .

قلت : يابو الشباب وش الي خلك وراي .

انا الحين مستعجل الوالده تنتظرني بوديه مشوار بعيد .

قال : يعني مايمديك توصي احد من اخوانك .

قلت : لا والله مايمديني .

قال : اجل بكرا .

قلت : بكرا انا جاهز ولا عندي اي شي ,, وراح افضي نفسي لك .

قال : خلاص بكرا .............. بكرا .....................

المهم .....

وماصدقت على الله يروح من عندي ومامداه يوريني عرض اكتافه الا انا داعس ..

ومسوي اني منحاش الحين ,,

ومع الدايري الشرقي كل ماتعديت سياره يدقق لي بواري

مثل قوالت ياملا الطيره ,, الي تطيرك ..

واخذ لي شوين وراعي يسار ٍ مني .

الا هذا هو داعس معي .

انا نشف ريقي بغيت ابلع لساني .

قلت لايكون هذا صدق ملك الموت ...

الوكاد .........

وبين الزحمه يما فارقته ,, واتله للبيت الا يمكن لي ساعه من طلعت من الدوام .

يوم جيت البيت ,, الا الربع يتنوني على الغداء .

قلت انا والله مابي غداء تغدووو ( وين انا والغداء )

قالت امي وش عندك اليوم تأخرت حيل .

قلت اليوم صار عندنا ضغط بلشركه وماخلصنا الا الحين ..

ويمكن بكرا يرسلوني لأرتيريتا ذهاب بلا عوده
لا تصدقون اني قلته ...

مابي احد يحس اني ما اقاوم وقت الشده .

الوكاد اني صرفتهم ...........

ويوم جت حزت النوم اخر الليل , وهو يطير نومي تذكرت المطوع رفيتسي .

ويوم قمت من بكرا ...

قلت اليوم مذبوح مذبوح ..

مار اشوى مابه شين اوصي عليه

لا عيال ... ولا مال .....

والله وانا اداوم واكره ماعندي وقت البريك ( الاستراحه ) .

ذاله يشوفن ويغثني بعد .

والله يوم جت الاستراحه وننزل انا ونايف سوى

يوم راعينا بنص السيب تحت ...

الا العالم متجمعه واحد فوق واحد ...

قلت .. عوذا

هذولا وش بلاهم

قال : نايف امش خلنا نشوف وش بهم ؟؟

يوم جيناهم

الا المطوع طايح بالارض .. والعالم يراعوله

وهو يقول بصوت منخفض حيل

ابي الجنه ........ ابي الجنه ...............

والله وهم يبعدون عنه الناس

وهو يجي واحد من خويانا بالعمل رجال ٍ ملتحي وملتزم ...

وهو يقراء عليه

ويم جاء عقب وهم يشيلونه يودونه للمستشفى ...

وهو يجينا خبره من واحد من خويا نايف يقول انه :::

رثع بالمستشفى

وقـّطـع مغذياتهم

ونـّــتف شوشته

ويقولون انه طلع مريض نفسي ..

وبعد كم يوم من هالسالفه جانا خبر انهم فصلوه من الشركه .

قلت الحمد لله .. الي فصلوه قبل يفصل رقبتي ..

هذي السالفه

وأســف على الاطاله

ــ لكم كل ودي وتقديري ,,,

ههههههههههههههههه والله حالتك حاله يا نسيب كاكا

بس ماشاء الله عندك اسلوب قصصي شيق وممتع

لاتحرمنا من قصصك الحلوه

ولك تقييم قصه لي انا و نايف 33842

نسيب كاكا
الله يعطيك العافيه على ابداعك وسلوبك الجميل والشيق
وننتظرجديدك يانسيب كاكا
ولك خالص احترامي
اخوك
الوفاء طبعي
تقبل مروري ولك ودي واحترامي

عضو جديد المساهمات : 36 تاريخ التسجيل : 22/12/2009

تسلم ايدينك على القصه الحلوه